Starling uppskrift/knitting pattern

Þessi peysa er á sér fyrirmynd í flugi og fjöðrum hins oft vanmetna Stara, sem er mun fegurri en vinsældir hans gefa til kynna. Á berustykkinu er innblásturinn hið svokallaða murmuration flug þar sem stórir hópar fugla fljúga sem ein heild og mynda töfrandi mynstur. Bolur, ermar og stroff byggja síðan á litbrigðum í fjaðurhami fuglsins.

Peysan er prjónuð ofanfrá og skipt í ermar og bol að loknu berustykkinu. Byrjað er á bráðabirgðauppfit og hálslíningin, sem er hækkuð lítillega að aftan með stuttum umferðum svo flíkin sitji betur, er prjónuð í lokin. Bolurinn er prjónaður án útaukninga eða úrtöku en undir miðjum ermunum eru reglulegar úrtökur. Stroff á ermum og bol eru tvílit.

Garn  

Grunnlitur      Schoppel Bio Merinos (50g/150m): Night Tweed

Mynsturlitir    Mohair By Canard, 2ply Kid Mohair and Merino (175m/50g) :

                           A: 2103, drapplitt

                           B: 2023, tegrænt

                           C: 2006, eplagrænt

Magn               Grunnlitur: 200, 220 (230, 250, 270) 280,        290, 300 g

                           A: 30, 30 (33, 35, 38) 40, 42 , 45 g

                           B: 33, 35 (37, 40, 42) 44, 46, 48 g

                           C: 33, 36 (38, 41, 43) 45, 48, 50 g

Prjónar             Hringprjónar, 4mm í meginfletina og 3,5 í stroffin. Athugið að aðlaga prjónastærð að prjónfestunni ef þörf krefur.

Prjónfesta í sléttu einlitu prjóni í hring:  24 lykkjur gera 10cm.

8 Stærðir í brjóstvídd/yfirvídd: 88, 94 (100, 106, 113) 119, 125, 131 cm.

Uppskriftin er á íslensku.